星期日下雨天，百無聊賴下獨個兒去了深水埗掃街！正好今日唔駛陪女友仲唔作反咩？(係去食街頭小食咋)
既然今日過嚟深水埗掃街，當然要配合一下深水埗街坊嘅形象喇。今日落雨就著了一條深藍色碎花短褲仔，上身一件圓領T恤！當然唔少得一雙人字拖喇！再擔住口煙，完全係鴨寮街與北河街交界嘅宅男無異。好鬼麻甩呀！嚟到深水埗一出地鐵站，例牌走去黃金/高登商場，睇下呢期有乜新Game？跟手再沿路殺落元州街睇下高達模型！當然唔少得掃街呢個指定動作喇，其實同女友一定唔會咁行街囉，要知道深水埗所有美食都圍繞桂林街、福榮街附近一帶。旁邊又有街市和雜亂無章的小檔攤，邊鬼會同你咁行吖！
美食第一站！今次一於由荔枝角道開始起喇！"真功夫雞腿卷"顧名思義係食雞腿卷的地方，但佢又唔係獨沽一味只發售雞腿卷的。竟然仲有奇亞籽添喎！雞腿卷 $18和雞翅包飯 $25，分別有原味、椒鹽、起司、麻辣、檸檬、甘梅、蒜味、孜然、芥末、咖喱！今次我揀選了雞腿卷，第一口咬落去的感覺是鹹香！芝士味反而不是很濃，熱辣辣的非常香口。下次我會嘗試一下麻辣和芥末味！
美食第二站，"新香園"有50年老經驗，最出名除了有蛋牛治之外，要數豬手麵和佢哋的粥品！還有西多、紅豆冰及菠蘿冰等等... 間嘢排隊排咗唔駛五分鐘便可入內，算係咁喇！今次我點了一份馳名蛋牛治烘底再加杯咖啡！蛋和牛肉的比例恰到好處，牛肉味香濃。果然名不虛傳！
美食第三站，"阿一豆腐花"今次我揀選了銀杏豆腐花 $10！豆腐花味道豆味濃郁，款式繁多不能盡錄！(其實唔記得咗) 食到呢一刻其實已經飽咗！一陣返到屋企食唔落飯，又俾阿媽鏟鑊金。但....說好的減肥呢？算喇，唔食飽又邊有氣力減肥呢？係咪...!?
留言
張貼留言